Beint í efni

Útskriftarverkefni ljósmæðra til MSc gráðu til viðbótar við Cand.Obst. gráðu árið 2025

Frá því nám ljósmæðra breyttist árið 2019, og varð MSc gráða til starfsréttinda, hafa starfandi ljósmæður sem luku eldri Cand.Obst. gráðu verið iðnar við að bæta við sig viðbótarmenntun til meistara-gráðu. Rannsóknarverkefni sem þær vinna í slíku námi endurspegla gjarnan víðtæka reynslu þeirra af fjölbreyttum klínískum vettvangi og ættu því að höfða til lesenda Ljósmæðrablaðsins. Blaðið hefur síðustu ár kynnt slíkar rannsóknir stuttlega en hvetur ljósmæður sem lokið hafa meistaragráðu eindregið til að koma nánari niðurstöðum á framfæri með greinarskrifum í fagtímarit á borð við Ljósmæðrablaðið. Árið 2025 hafa í það minnsta þrjár ljósmæður lokið MSc gráðu til viðbótar við fyrri gráðu sína til starfsréttinda og óskar ritnefnd Ljós-mæðrablaðsins þeim innilega til hamingju. Meistaraverkefnin má finna á vefsvæðinu skemman.is, en að auki má í þessu tölublaði finna ritrýnda grein um eina af þeim rannsóknum sem hér eru kynntar.

Útskrift júní 2025

HEITI VERKEFNIS

„Ekki bara fæðingin“ – viðhorf og reynsla ljósmæðra af því að veita viðtöl um fæðingarreynslu í heilsu-gæslu: Eigindleg rannsókn.

HÖFUNDUR

Guðrún Hulda Gunnarsdóttir

LEIÐBEINENDUR

Valgerður Lísa Sigurðardóttir

Ólöf Ásta Ólafsdóttir

Árið 2021 var ákveðið að innleiða og bjóða upp á viðtöl um fæðingarreynslu við ljósmóður í heilsugæslunni. Guðrún Hulda kannaði viðhorf og reynslu ljósmæðra af að veita viðtöl um fæðingarreynslu og mat hvernig innleiðingin gekk. Tekin voru þrjú rýnihópaviðtöl við samtals 12 ljósmæður. Ljósmæður eru jákvæðar fyrir því að veita viðtal um fæðingarreynslu í heilsugæslu og telja mikil fagleg tækifæri felast í þessari þjónustu. Þrjú megin-þemu ásamt undirþemum voru greind og vísa þau til faglegs ávinnings, innleiðingar og frekari þróunar. Viðtöl um fæðingarreynslu stuðla að samfelldri þjónustu í barneignarferlinu og eru kjörinn vettvangur til fræðslu, stuðnings og heilsueflingar.

HEITI VERKEFNIS

Rifa er ekki það sama og rifa: Reynsla íslenskra kvenna af 2° spangarrifum.

HÖFUNDUR

Gréta María Birgisdóttir

LEIÐBEINANDI

Sigfríður Inga Karlsdóttir

Gréta María kannaði reynslu kvenna á Íslandi af áhrifum 2° spangarrifa á líkamlega og sálræna líðan í kjölfar fæðingar, ásamt reynslu þeirra af þjónustu í tengslum við spangarrifur. Tekin voru alls 13 einstaklingsviðtöl við 12 konur. Yfirþema rannsóknarinnar, Rifa er ekki það sama og rifa, lýsir því hversu ólík og krefjandi reynslan getur verið. Greind voru fimm meginþemu: Hefði viljað vita meira; Enn eitt klofið að sauma; Verra en fæðingin; Vont að týna sjálfinu; og Valdaleysi gagnvart heilbrigðisþjónustu. Konur vilja aukinn stuðning og fræðslu um spangarrifur frá heilbrigðisstarfsfólki og að tekið sé mark á líðan þeirra í tengslum við spangarrifuna.

Útskrift október 2025

HEITI VERKEFNIS

Tvær æðar í naflastreng (iSUA) – algengi og útkoma meðgöngu fyrir móður og barn í einburameðgöngu á Íslandi á árunum 2015–2022: Lýðgrunduð ferilrannsókn.

HÖFUNDUR

Signý Dóra Harðardóttir

LEIÐBEINANDI

Helga Gottfreðsdóttir

Tvær æðar í naflastreng hafa þekkt tengsl erlendis við vaxtar-skerðingu, fyrirburafæðingu og meðfædda galla. Signý Dóra kannaði algengi þessa fráviks í einburameðgöngum á Íslandi og tengsl þess við fylgikvilla, meðfædda galla og þjónustuþörf barna á árunum 2015–2022. Af 33.886 fæðingum greindust 193 tilfelli með tvær æðar í naflastreng (0,57%). Í þeim hópi kom fram aukin tíðni háþrýstingsvandamála á meðgöngu, vatnslegs, lágrar fæðingarþyngdar, fyrirburafæðinga og meðfæddra galla. Leitað var á Barnaspítala með nær helming barnanna á fyrsta aldursári. Í ljósi lágrar tíðni vaxtarskerðingar styðja niðurstöðurnar þó ekki við aukið eftirlit með fósturvexti á meðgöngu, heldur fremur markvissa skoðun og eftirfylgd barns eftir fæðingu.